Disclaimer*: The articles shared under 'Your Voice' section are sent to us by contributors and we neither confirm nor deny the authenticity of any facts stated below. Parhlo PInk will not be liable for any false, inaccurate, inappropriate or incomplete information presented on the website. Read our disclaimer.

غیرت مند مرد ہونے کے ناطے میں نے ہمیشہ غیرت کے نام پر قتل کو ہمارے معاشرے کی عظیم روایت گردانا ہے اور ایسا کیوں نہ ہو؟ میں کیسے گوارا کر لوں کہ میرے خاندان کی لڑکیاں غیر لڑکوں سے بات کریں؟ میں کیسے برداشت کرلوں کہ میری بہن اپنی مرضی کی شادی کرنے کی خواہش کا اظہار کرے؟ میں اپنی غیرت کو آگ نہ لگا دوں اگر میرے خاندان کی لڑکی میرے سامنے کھڑے ہو کر جائیداد میں حصہ مانگ لے؟ میرے برابر کھڑی

میں کیوں قتل نہ کرتا؟ لڑکیوں کے پاس اس بات کا کوئی حق نہیں ہے کہ وہ اپنے پروفیشن کا انتخاب کریں ۔ اسی وجہ سے تو قندیل بلوچ کو بھی مارا گیا تھا کہ اس نے اپنے پیشے کا انتخاب گھر والوں سے پوچھے بغیر نہ انتخاب کیا تھا بلکہ اچھا خاصا کمانا بھی شروع کر دیا تھا۔

چھ فروری کو حنا شاہنواز کو بھی اسی وجہ سے مارنا پڑا ۔27 سالہ حنا شاہنواز ہم سے پوچھے  بغیر بیوہ ماں ،بیوہ بھابھی اور بیوہ بہن کی کفالت کا ذمہ اٹھانے جارہی تھی ۔ہماری غیرت کیسے قبول کر لیتی یہ سب؟ اس کو اس طرح کماتے دیکھ کر ہمیں تو آگ لگنی ہی تھی ۔آج اگر اس کو چھوڑ دیتے اور وہ این جی او میں نوکری کر کے اس پورے کنبے کا بوجھ اٹھا لیتی تو کل کو ہمارے گھر کی عورتیں جن کو ہم نے پیر کی جوتی بنا کر رکھا ہوا ہے ہمارے سر پر برسنے لگتیں ۔ اتنی بے غیرتی کیسے برداشت کر لیتے ہم؟

پہلا حل تو ہمیں یہی نظر آیا کہ اس کی شادی اپنے جیسے کسی مرد سے کرادیتے ہیں وہی نکیل ڈال لیتا مگر اس نے تو حد ہی کر دی شادی سے انکار کر دیا اور زمین کو بیچنے کی کوششیں شروع کر دیں تاکہ اپنے اوپر سے وہ قرضے اتار سکے جو باپ کی بیماری اور بھائی کے قتل کے سبب ہوۓ ۔ہماری دھرتی ماں کو بیچنے کی بات کر رہی تھی، غیرت تو آنی ہی تھی ۔

مجبورا چار گولیاں اس کے اس دل پر مارنی پڑیں جس میں ہم مردوں سے آگے بڑھنے کی امنگیں مچل رہی تھیں ۔ان آنکھوں کو بند کرنا پڑا جس میں ان یتیم بچوں کو پڑھانے کے خواب مچل رہے تھے ۔ آپ ہی بتائیے کیسے اس کو روایتوں کو توڑنے دیتے؟ کیسے اس کے خوابوں کو پورا ہونے دیتے؟ میرے پاس دو ہی راستے تھے یا تو اپنی غیرت کو مار ڈالتا یا پھر حنا کو۔

 میرے برابر کھڑے ہوگی؟ جا اب جہنم میں جا۔ اب دیکھتا ہوں کیسے جائیداد میں حصہ لیتی ہے؟